теңіз десант операциясы

(Морская десантная операция)

қарсылас қорғаныста тұрған жағалауға десант түсіру және оның жағада жауынгерлік міндеттерді орындауы жөнінде келісілген және біртұтас жоспармен өзара байланыстырылған іс-қимыл. Т.д.о. құрлық әскерлері мен флот құрамаларының (бірлестіктерінің) әскери-әуе күштерімен, әуе шабуылына қарсы қорғаныс әскерлерімен және әуе десант әскерлерімен өзара байланысты іс-қимылы арқылы жүргізіледі. Т.д.о-ның мақсаты төмендегідей болуы мүмкін: бұғаз аймақтарын, жағалаудағы маңызды аудандар мен ірі аралдарды, қарсыластың әскери-теңіз базалары мен басқа да объектілерін алу, теңіз бойы бағыттарында шабуылдаушы әскерлерге олардың қарсылас топтамаларын талқандауына және флоттың орналасу жағдайын жақсартуға көмек көрсету. Теңіз десанттары жағалауға оперативті-стратегиялық немесе оперативтік мақсатта түсірілуі мүмкін. Т.д.о-на қарсыластың десантқа қауіп туғызатын кеме және авиация топтамаларын талқандау немесе әлсірету, операция өткізіліп жатқан ауданда қолайлы жағдайды сақтау, әскерлерді десанттық кемелер мен көлік кемелеріне отырғызу, десантты теңізбен алып өту, қарсыластың десантқа қарсы қорғанысын басу, десантты түсіру үшін ұрыс жүргізу және десанттың жағадағы міндеттерді орындауы, сондай-ақ, теңіз десантын қамтамасыз ететін әскерлер мен күштердің ұрыс қимылдары кіреді. Операцияны жүргізу үшін мынадай топтамалар құрылады: теңіз десанты әскерлері, әуе десанты (егер олар операцияда қолданылатын болса), түсіру күштері, теңізбен өтуде және түсіру ауданында десантты шұғыл тасалау күштері, ракеталық әскерлер, әуе шабуылына қарсы қорғаныс әскерлері мен авиация, сондай-ақ күштер қоры. Т.д.о-н басқару жалпыәскер құрамасының не флот құрамасының басшылығына жүктеледі.